Mach ti, Maria, it ses sensa magagne!
'T ses come l'aria sclin-a,
't ses come l'acqua frësca
dël Pian dla Mussa:
as beiv, as beiv: oh, che sodisfassion!

Ma, povra fom-na, 't l'has avun-e
'd co ti 'd batoste! Epura, tò soris
l'é sempre lì, come 'na bela steila;
e tò cheur a l'é creusi come 'l mar.

Mama, mi i penso a tut lòn che 't l'has fait
ant la mia vita, 'nt la vita dël mond!...
Cosa it l'has fait? It l'has vorsun-e bin!
Mi, noijaotri i marcioma con dë sbande
ch'a gavo 'l fià; e ti 't ses sempre lì,
con tò magon, con tò sospir 'd passiensa;
't ses sempre lì, con i tò bras bin larg,
per s-cianchen-e d'ant j'onge dël malheur.

It ses 'na mama; a j'é Bin poch da fé!
'T ses mama fin-a an fond, perché a j'é gnente
andrinta a ti, ch'ët fassa barboté
come s'ët distorbeisso. Ti 't sas nen
cosa ch'a l'é 'l gavass ëd l'egoismo;
't ses tuta mama: mama fin-a an fond!

A l'é perchè che 't ses sensa magagne,
perché che 't ses la mama dël Signor;
ma a l'é anche perchè che 't l'has dit sì
e 't lo ripete sempre: tuti i dì.