'T ses bianc e luminos come la fiòca;
'ndrinta 'l tò cheur as perdo 'l mar e 'l cel.
Quand che toa man a s'aossa a benedì,
la vita a sponta, frësca, antorn a ti.
Veuj ditlo fort, veuj ditlo pian pianin:
Papa, pastor e pare, mi it veuj bin.
I malign a t'insulto, a 't mostro i dent,
con 'na rabia ch'haj fa cit e meschin;
ma ti 't ij slarghe i brass con gran pietà:
"Avnì, seve i mè fieuj, povre masnà!
La vostra cross a l'é pesanta e dura;
veuj portela 'd co mi. L'eve paura?"
A diso che 't conosse tante lingoe,
ma mi i lo chërdo nen; son un pò drola...
Ti 't dise sempre 'na parola sola:
la parola ch'a salva e ch'a consola.
'T sass parlé mach la lingoa dël Signor:
la lingoa 'd pas, ëd verità e d'amor.
Veuj ditlo fort, veuj ditlo pian pianin:
Papa, pastor e pare, mi it veuj bin.
