Turin, 't ses propi ti la mia sità!
An fond al cheur i sento che 't veuj bin.
Dal prim dì dla mia vita i l'hai portà
tò nom ascrit ant l'anima, Turin!
Milan a l'é pi grand e pi potent:
a l'ha tante richësse e tanta gent,
ma ti, Turin, ti 't ses la mia sità.
Firensse a l'é la patria dij artista,
a Genoa j'é 'n pòrt dij pi glorios,
Napoli a l'ha sò cel, soa bela vista,
a Venessia a j'é 'n mar meraviglios;
Roma, ch'an canta 'ndrinta con dolcëssa,
a l'ha 'l Papa, e a l'é pien-a 'd forssa e 'd blëssa;
ma ti, Turin, ti 't ses la mia sità.
Të stende 'n riva al Po, 'ntla gran pianura
vestija dël verd alegher dle campagne;
le colin-e at fan come 'na sentura,
e 't ses ancoronà da le montagne.
A j'é 'na steila d'or an sla toa front;
it ses la gran regin-a dël Piemont,
Turin, mia bela tera, mia sità.
'T ses eleganta, con le vie spassiose,
con le fontan-e, con ij monument
ch'a ricordo le impreise luminose
dla toa storia 'd valor e d'ardiment.
'T l'has la forsa ëd na guardia d'ij confin
e la grassia gentila d'un giardin,
Turin, mia bela tera, mia sità.
Tò pòpol a travaja con valor,
a ten dur, con costanssa e con passion,
a l'ha profond ant l'anima l'amor
per j'ideaj ëd bin e 'd dedission;
a l'é nen espansiv, ma a l'ha potent
an fond al cheur l'ardor dël sentiment.
It l'has formalo ti, cara sità.
Da tante tere peuj 't ses invidià
per la toa fede e i tò tesor pressios:
ël Cotolengo, perla 'd carità,
l'Oratori 'd don Bosch, così operos,
ël miracol ëd l'Ostia e 'l grand onor
ëd conservé la Sindone 'd Nossgnor.
Son orgogliosa 'd ti, cara sità.
Ma j'oeuj an brilo 'd gioia e 'd comossion
specialment quand che 't vëdo anginojà,
ant un aslans d'amor e 'd divossion,
davanti a la Madona Consolà.
Maria l'é staita sempre protetriss,
mama afeto-osa, goida, aosiliatriss
dij tò fieuj d'ogni temp, cara sità.
Oh, staje sempre 'nsema, bin davsin,
e le disgrassie mai at colpiran;
disje ch'at mostra 'l cheur 'd Gesù Bambin
e ch'at fasa marcé tnend-te per man.
Chila a l'é sempre pronta a 'ncoragete,
a sorid-te, a difend-te, a perdonete;
ti cerca d'esse sempre soa sità.
