Portè 'l tò nom a l'é 'na gran dolcëssa,
ch'a fa content ël cheur.
Porté 'l tò nom a l'é 'na gran richëssa,
a l'é grassia e bonheur.
Con un gentil pensé mia santa mama
l'ha consacrame a ti;
da col moment lontan l'anima ët ciama
con fede neuit e dì.
Tuti i sant con amor e con sapienssa
a goardo i so protet,
ma gnun a peul avej toa gran potenssa,
tò soris benedet.
Lor a son prinssi, e ti 't ses soa regin-a,
gloriosa, ancoronà.
Ti 't ses 'na reusa bianca, sensa spin-a;
lor a son fior dël prà.
Ti 't ses, Maria, la luce dla mia vita
e 't fasse tut pi bel;
ti 't ses la voss passienta ch'a m'anvita
a marcé vers ël cel.
Quand ch'i l'hai tanta freid, quand ch'i l'hai fam
come i cit sensa cà,
quand ch'i vëdo mè cheur pover e gram,
it ciamo e i son salvà.
Ël tò nom a l'é fort come la fiama
ch'a fa fonde ij metaj;
A l'é 'n nom inocent, un nom ëd mama,
ch'a distruv tuti i maj.
Oh, fa ch'an viva 'nt l'anima, Maria,
splendent e luminos,
steila sensa tramont; e fa ch'a sia
per mi 'n impegn glorios.
